Toyota-ның қатты денелі батареясы 1200 км жол жүруге жетеді

Үндістанда өткен саммитте жергілікті Toyota Kirloskar Motor бірлескен кәсіпорнының басшысы Викрам Гулати бір-екі жылда қатты денелі аккумулятормен жүретін «тойота» жолға шығатынын айтты деп хабарлады Reuters.

Бірақ үнді кәсіпкерінің сөзіне сену қиын, өйткені Toyota-ның өзі қатты денелі электролиті бар батареяның сериялы нұсқасы 2027-2028 жылдан ерте шықпайды деп болжады. Марка оны Idemitsu Kosan мұнай компаниясының химиктерімен бірге дайындап жатыр.

Toyota электромобильдеріне арналған қатты денелі аккумулятор параметрі бұған дейін белгілі болған. Энергия сақтау деңгейі жоғары болғандықтан жүріс қоры 1200 км-ге жетеді, ал толық қуаттауға небәрі 10 минут кетеді.

Қатты денелі батарея электромобиль саласына үлкен жаңалық әкеледі, қуаттау уақыты қысқарып, жүріс қоры артады және өрт қауіпсіздігі жақсарып, батареяның қызмет ету мерзімі ұзарады. Әртүрлі елдің көптеген компаниясы осындай өнім жасауға құлшына кірісіп кетті, бірақ қазірше сериялы аккумулятор шыққан жоқ.