Toyota мен Suzuki шағын электрокроссовер шығарады

Toyota электрлі кроссоверін 2021 жылы желтоқсанда таныстырған. Сол кезде бренд көп ұзамай жолға шығатын он бес өнімін бірден көрсетті. Процесс жүріп жатыр. Best Car таратқан ақпаратқа сүйенсек, 2025 жылы Toyota мен Suzuki бірлесіп жасайтын bZ Small Crossover моделіне кезек келеді.

Басылым жаңа көлік алдымен Жапонияда саудаға түсетінін атап өтті, бірақ Еуропаға жол тарту мүмкіндігі де жоғары. Былтыр концерннің ресми өкілдері 2026 жылға қарай қарт құрлыққа bZ маркалы бес электромобиль жол тартады деп мәлімдеген еді.

Алпауыт компанияның серіктес ретінде Suzuki-ді таңдауына оның қала көшелеріне бейімделген шағын машиналар жасаудағы тәжірибесі себеп болғанға ұқсайды. Дегенмен екі бренд бұрыннан жақын араласып, өзара ұқсас модельдер шығарып жатыр.

Toyota bZ Small Crossover бұл сегментте Hyundai Casper-дің электрлі түрімен және 2026 жылы жарық көретін батареялы VW ID.1-мен бәсекелес болады.