«Тойота Мотор» жаңа Toyota мен Lexus көліктерінің ұрлығын түбегейлі кемітуді жоспарлауда. Бұл мақсатқа жету үшін аталған темір тұлпарларды қылмыскерлер үшін тартымсыз ете түсетін немесе оңай сәйкестенетіндей қылатын бірқатар шаралар қолға алынған.
Жаңалықты «ұрлаудан қорғайтын бірегей сәйкестендіргіш» деп атапты. Ол автокөліктің VIN-нөміріне бекітілген PIN-кодтан тұрады. Олар бір қарағанда көзге түспейді. Аталған элементті тек бірнеше есе ұлғайту арқылы көруге болады. Оны педаль, ілмек, келте құбыр, қаптама сынды көліктің көптеген бөліктеріне салу жоспарланған. Яғни, қылмыскерлер VIN-ді ауыстырып қойса да, көлік пен оның өзге бөліктерін сәйкестендіруге мүмкіндік бәрібір болады.
Компания жоспарының екінші бөлігі — бұл VIN-коды бар жаңа тақтайшалар. Оларды алып, қайта орнату мүмкін болмауы тиіс. «Тойота» мамандары оны қайта жапсыруға тырысқан жағдайда, жапсырманың бүлініп қалатынына сендіреді. Сондай-ақ, нағыз VIN-кодтың жиегі ультракүлгін жарық түсірген кезде жарқырайды екен.
Егер VIN-код жазылған қосымша тақтайшаларды Toyota мен Lexus-тің кейбір үлгілерінен әлден кездестіруге болса, ал ұрлауға қарсы сәйкестендіргіш ең алдымен жаңа ES және UX үлгілерінде пайда болмақ. 2019 жылдың шілдесінде таңбалар жаңа «лексустер» мен «тойоталардың» барлығында болады.
Комментариев: 0