Toyota Land Cruiser 300-ге тапсырыс қабылдау тоқтады

Биыл 1 шілдеде Toyota ресми сайтында TLC сатып алғысы келетін клиенттерге арнап кешірім сұрау хатын жариялады. Онда былай деп жазылған:

«Тапсырысты кешіктіргеніміз үшін кешірім сұраймыз. Land Cruiser-ді жапондар ғана емес, әлемнің өзге елдері де жылы қабылдады. Тапсырыс саны өндіріс қуатымыздан асып кетті. Сондықтан тапсырыс алуды тоқтата тұруға тура келді. Қашан қайта жалғасатынын алдағы өндірістік жағдайға қарап хабарлаймыз.

Қолайсыздық үшін кешірім сұраймыз және түсіністік танытқандарыңызға алғыс айтамыз».

Жапониялық Yahoo басылымы хабарлағандай, модельдің ең танымал комплектациясын алу үшін бес жыл күту керек. Жаңа буындағы Lexus LX-ке де тапсырыс қабылданбайды.

Жол талғамайтын көліктер тапшы болғандықтан, Жапонияда алыпсатарлар көбейіп кетті. Клиенттер машинаны белгіленген мерзім ішінде қайта сатуға тыйым салатын келісімшартқа қол қойса да, оңай ақша тапқысы келгендер көлікті 18–30 млн иен аралығында сатып жатыр, ал көліктің ресми құны 8 млн иеннен (27.5 млн теңге) басталады. Қазақстанда TLC 300-дің ресми бағасы 40 млн теңгеден басталады, бірақ шын мәнінде көлік құны бұдан бір жарым есе жоғары.

Қытайдағы FAW-Toyota бірлескен зауытындағы мамандар Toyota Land Cruiser 300 шығарса жағдай жақсаратын шығар. Қазір модель Жапонияның Айти қаласындағы зауытта ғана жасалады.

«Тойотаның» Қазақстандағы ресми сайтында тапсырыс қабылданбайтыны туралы ақпарат жоқ. «Лексус» LX 600 де әлі сатылып жатыр.