2023 жылдың қорытындысы бойынша Toyota Hilux Аустралиядағы ең танымал пикап атағын соңғы жеті жылда алғаш рет жаңа Ford Ranger-ге берді. Сол себепті тездетіп рестайлингтен өткізген сияқты. Компания Аустралияға арналған көліктің эксклюзив нұсқасын жасады, оның сыртқы түрі өзгерген және жұмсақ гибрид мотормен үйлеседі.
Пикап үшін ерекше тік ендірмесі бар және қорғаныш пластинаға ұқсатып жасалған жаңа бампер, бірегей маңдайшасы бар басқаша радиатор торы әзірленген. Элементтердің дизайны комплектацияға байланысты өзгеруі мүмкін. Артқы бортта амортизатор пайда болды.
Бұрын Аустралияда пикап 204 ат күшін (500 Нм) беретін 2.8 литрлік дизельді қозғалтқышпен жабдықталатын. Бренд қозғалтқышты аса өзгертпеді, тек 48 вольтты стартер-генератор орнатты, ол қозғалтқышқа уақытша 16 ат күшін (65 Нм) қосып көмектеседі. Электрлі қондырма арқасында пикап сұйық отын үнемдейтін болады (Toyota-ның есептеуінше 6–10%), шу мен діріл бәсеңдейді. Жергілікті гаммадағы басқа агрегаттарға тиіспеді, оған артқы жетекпен немесе толық жетекпен, сонымен қатар механика немесе автомат қорабымен ұсынылатын 2.4 литрлік дизельді қозғалтқыш, 2.7 литрлік бензинді қозғалтқыш кіреді.
Жұмсақ гибрид нұсқаның Аустралиядағы құны электрлі емес аналогынан шамамен 1000 доллар қымбат болады.
Hilux басқа нарықта осы дизайнмен шыға ма, жоқ па, әзірге белгісіз. Toyota жергілікті рестайлингті жаһандық деңгейде саудалауы әбден мүмкін. 2015 жылы нарыққа шыққан модель үшінші рет жаңарып отыр. Қазіргі жақсартулар буын алмасу алдындағы соңғысы болар.
Комментариев: 0