Toyota-ның Америкадағы өкілдігі 2023 жылғы топтамаға енетін Highlander-ді таныстырды. Сырттай жеті орынды машина мүлде өзгермеген, тек техникасында жаңалық көп. Жол талғамайтын көлікке мамандар Lexus NX-тің былтыр жарық көрген екінші буынындағы T24S сериялы 2.4 турбомоторын қойыпты.
Агрегат модельдің мотор гаммасын толықтырып қана қоймай, 3.5 литрлік атмосфералы V6-ның орнын басқанын айта кеткен жөн. Турбомоторға өткен «хайлендердің» қуаты кеміді. Енді ол 299 орнына 269 ат күшіне ие. Ал айналу моменті 357-ден 419 Нм-ге артты. Машина 100 км жолға бұрынғыдай 9.8 л жанармай жұмсайды.
Беріліс қорабы өзгермеген. Турбомотор 8 сатылы автоматпен жұмыс істейді. Модельдің қарапайым нұсқасы алдыңғы жетекті болады, толық жетекті көлік алам десеңіз көбірек ақша жұмсауға тура келеді.
Жаңа қозғалтқыштан бөлек Highlander салоны да біршама жаңарды. Опциялар тізімінде 12.3 дюймдік экранға негізделген цифрлы аспаптар панелі мен көлемі дәл сондай экраны бар жаңа медиажүйе пайда болды.
Түрленген Toyota Highlander АҚШ тұрғындарына күзде сатыла бастайды. Нақты бағасы әзірше белгісіз, бірақ қазір 36 мың доллардан (15.9 млн теңге) саудаланып жатқан базалық модельден қымбатырақ болатын сияқты. Ал V6-мен жүретін толық жетекті үздік нұсқасы 50 мың доллар (22.1 млн теңге) тұрады.
Турбомоторлы Highlander біздің елдегі автосалондарға жете ме екен? Келіп қалуы әбден мүмкін, өйткені сатушылар қазір жергілікті нарыққа тек толық жетекті нұсқасын ұсынып жатыр. Қазақстанда ресми бағасы 32.2- 37 млн теңге аралығында.
Комментариев: 0