Toyota электромобиль өндірісін қысқартады

Nikkei Asia басылымы хабарлағандай, Toyota жабдық жеткізушілерге электромобиль өндірісін азайтып, 2026 жылы 1.6 млн емес, 1 млн машина шығарамыз деп мәлімдеген. Биыл 400 мың машина құрастырады.

Электрокар өндірісінің мұнша төмендеуіне қазір EV сегментіне сұраныс азайғаны себеп болды. Атап айтқанда, Ford жақында үш қатарлы электрокроссовер жасаудан бас тартып, F-150 Lightning пикабының ізбасарын шығаруды 2027 жылға қалдырды. Ал Volvo 2030 жылдан бастап тек электромобиль шығару жоспарын өзгертті. Қазір әлемде plug-in гибрид танымал, сол үшін автоөндірушілер клиент тілегін ескеруге мәжбүр.

Компания даму стратегиясын түбегейлі өзгертпейді, тек аздап түзетеді. Былтыр 100 мың электрлі «тойота» мен «лексус» шыққан. Toyota 2030 жылға дейін электромобиль өндірісін 3.5 млн данаға жеткізу жоспарын өзгерткен жоқ.