Toyota дизельді Land Cruiser, Hilux және Fortuner сатуды тоқтатты

Toyota дизельді қозғалтқышпен жүретін автомобиль сатуды тоқтатты, оған мұндай моторды сертификаттағанда ереже бұзу әрекеті тіркелгені себеп болды. Мәселе Toyota-ға ғана емес, Lexus, Mazda және Hino-ға да қатысты.

Жапон компаниясы 1GD, 2GD және F33A сериялы моторлардың қуат параметрі жайлы дерек дұрыс емес екенін мойындады. Сериялы машиналар сынақ кезінде Toyota Industries Corporation (TICO) мамандары пайдаланған нұсқадан өзгеше электронды басқару блогы бар дизельді мотормен жабдықталыпты.

Ақау тәуелсіз сарапшылар Toyota басшыларының рұқсатымен жүк көтергіш және құрылыс техникасын тексергенде анықталды. Кейін Toyota Land Cruiser 300, Land Cruiser Prado (J150), Hilux, Fortuner, Lexus LX 500d, коммерсиялық Hino Dyna және Mazda Bongo Brawny қатарлы он модельде де проблема бар екені белгілі болды.

29 қаңтарда Toyota өкілдері экологиялық көрсеткіш шынайы екенін, бұған дейін сатылған дизельді көліктерді пайдалана беруге болатынын хабарлады.

Бірақ тергеу жүріп жатқандықтан, TICO дизельді агрегат өндірісін тоқтатты, ал бас компания бүкіл әлемдегі дилерлерге дизельді автомобиль жеткізбейді. Дизельді «тойота» алғысы келетіндер аз емес, былтыр мұндай машинаның 84 мың данасы өткен.

«Проблема туындағаны үшін клиенттерімізден кешірім сұраймыз», — деді Toyota бас директоры Коджи Сато Токиодағы баспасөз жиынында. Сато компания мәселені тез арада шешуге тырысатынын айтты.