Біздің елде «жетпісінші» деген атаумен танымал сегізінші буындағы Toyota Camry 14 жылдан кейін Батыс Еуропаға оралды. Әлемдегі ең танымал D+/E-классты седан көктемде өндірістен алынған британдық Avensis-тің орнын басады. 1982 жылдан бастап, күллі дүние жүзіне Toyota Camry-дің 19 миллион данасы таралып, географиясы 100-ден астам елді қамтығанына қарамастан, ол сұраныстың төмендігінен 2004 жылы еуропалық нарықтан кеткен еді.
2003 жылы еуропалық дилерлер 2 500-ге де жетпейтін «отыздық» көлікті сатқан болатын. Сол мезетте гаммасында дизельдер мен шанақтың бірнеше түрі бар Avensis 102 мың дана тиражбен таралған еді.
Бүгінде Toyota үлгіні еуропаға бір кейіпте қайтарды. Жергілікті тұтынушыларға АҚШ пен Жапонияда әлден сатылып жатқан тек гибридті нұсқасын ұсынады. Toyota Camry Hybrid 2.5 литрлік атмосфералы (178 а.к) қозғалтқыштан, 120 күшке ие электрлі мотор мен электрлі механикалық вариатордан тұратын күштік құрылыммен жабдықталады. Седан жүзге дейін 8.3 секундта екпін алады, ең жоғарғы жылдамдық 180 км/сағ-пен шектелген. Отын шығыны орта есеппен 100 шақырымдық жүріске 4.2 литр межесін құрайды.
Camry-ді қайта іске қосу шарасы 2019 жылдың алғашқы тоқсанына жоспарланыпты, автокөліктер Жапониядан жеткізілетін болады. Жаңа Camry-дің кәрі құрлықта жоғары сатылымға жете қоймайтыны түсінікті әрине, оның үстіне, оның универсал шанағы бұрыннан жоқ әрі болмайтын да сияқты.
Комментариев: 0