Toyota Camry 80 Қазақстанға келді

Бренд Camry-дің тоғызыншы буынын былтыр қарашада таныстырған, енді ол қазақ жеріне ресми түрде аяқ басты. Біздің елде модель екі күштік құрылыммен жабдықталады, біреуі — гибрид.

1 / 9

Официальная Toyota Camry 80 в Казахстане: сколько стоит?

1 / 9

Стандарт машина 204 ат күшіне ие (240 Нм) бензинді атмосфералық мотормен жүреді. Агрегат 8 сатылы автоматпен жұмыс істейді. Жылдам қозғалатын седанды жөн көретіндер 2.5 литрлік моторы бар гибрид Camry алса болады. Электромеханикалық вариатормен жұптасқан агрегат 186 ат күші мен 221 Нм момент береді. Жалпы қуаты 230 ат күшіне жетеді. Нәтижесінде, қарапайым Camry алғашқы жүздікті 8.9 секундта алса, бензин-электрлі машина бұған 7.2 секунд жұмсайды.

Гибрид Camry бізге таңсық емес, бірақ оны жекелеген адамдар әкелетін. Ресми шоурумдар клиенттеріне мұндай нұсқа ұсынған жоқ.

Қазақстанда Camry 80-нің бес комплектациясы сатылады

Ең арзан көліктің бағасы — 18.8 млн теңге. Бұл ақшаға жеті қауіпсіздік жастығы мен Toyota Safety Sense + 3.0 көмекші электроникасының толық жинағын (тежеу жүйесі, көрінбейтін аймақтарды бақылау, бейімді круиз-бақылау, қозғалыс жолағын қадағалау және жолақта ұстау, алысқа түсетін жарықты автоматты басқару жүйесі) алуға болады. Жабдықтар тізімінде кілтсіз басқару жүйесі, жарық және жаңбыр сезгегі, екі аймақты климат бақылау, жүргізуші орындығын электр күшімен реттегіш, 12.3 дюймдік экраны мен алты динамигі бар медиажүйе, аспаптар панелінің 7 дюймдік дисплейі, сымсыз қуаттағыш, алдыңғы орындықтарды, айна мен алдыңғы әйнектің жиегін жылытқыш және т. б. кіреді. Салоны матамен қапталған.

«Престиж» деп аталатын түрінің құны — 20.8 млн теңге. Ол жарықдиодты шам, күңгірт артқы әйнек, артқы көрініс айнасын автоматты түрде қараңғылау функциясы, алдыңғы жолаушы орындығы мен рөл колонкасын электрлі реттегіш, алдыңғы орындықтарды желдеткіш, ауа ионизаторы, 12.3 дюймдік цифрлы аспаптар панелі және рөл жылытқышпен толыққан. Салоны экобылғарымен қапталады.

1 / 8

Үздік «Люкс» нұсқасын алам десеңіз, 22.8 млн теңге санап бересіз. 2.5 литрлік мотормен жүретін седанда цифрлы салон айнасы, жүргізуші орнын баптау жады, жолаушы орындығындағы реттелетін бел тірегіш, артқы диванды жылытқыш, үш аймақты климат-бақылау, тоғыз динамикті аудиожүйе, айнала шолу камералары, кәдімгідей жақсарған автотежеу жүйесі, күннен қорғайтын перде және проекциялық дисплей бар.

Дилерлер гибрид Camry-дің «Престиж» және «Люкс» комплектациясын саудалайды. Біріншісі — 21.8 млн, екіншісі 23.8 млн теңге тұрады. Гибридте жоғарыда аталған жабдықтардан бөлек радиатор торындағы автоматты қалқа, Eco, Normal және Sport қозғалыс режимдерін ауыстырғыш болады.

Жаңа буын өкілі Camry 70-тен қаншалықты қымбат

«Сексенінші» модельдің бағасы алдыңғысынан әлдеқайда жоғары. Өйткені 2.5 литрлік қозғалтқышы бар Camry 70-тің құны соңғы айларда 15.9 млн теңгеден басталып, 19.8 миллионға дейін барды. Бірақ тамыз бен қыркүйекте жаңа модель келеді деп ескісі біршама арзандағанын атап өткен жөн. Жыл басындағы прайсты есепке алсақ та, Camry 80 біршама қымбат екені байқалады. Мәселен, қаңтарда «жетпісінші» седан 17.3-21.5 млн теңгеден саудаланды.

Біраз уақыт бұрын QAZ Kolesa KZ редакциясы америкалық “сексенінші” модельдің әуселесін байқаған. Camry 80-ге жасалған шолуды YouTube-арнадан көріңіз.

Айтпақшы, Қазақстанда ресми сатылатын Camry 80 Жапониядан келеді.