Toyota C-HR сынақтан өтіп жатыр

Шағын Toyota C-HR кроссоверінің прототипі «Нордшляйфте» сынақтан өтті. Прототип суретін Carscoops жариялады. Автомобиль пленкамен қапталған, бірақ сырт пішіні анық көрінеді. Сериялы С-HR 2022 жылғы C-HR Prologue концептісінің көшірмесі болады.

1 / 6

• 
• 
• 
• 
• 
• 

1 / 6

Камуфляжбен жабылып тұрса да прототипте алдыңғы бампер мен артқы тірек бейнесі анық көрінеді. Сериялы C-HR концептіден кішірек дөңгелегі және кей тұстағы өзгеше формасымен ғана ерекшеленеді. Мысалы, сынақтан өтіп жатқан машинаға агрессивті емес спойлер және дәстүрлі артқы шам орнатқан.

Қыста фототыңшылар кроссовердің интерьерін көруге тырысқан, бірақ сәті түспеді. Дегенмен салонында үлкен орталық дисплейі бар бөлек экрандар тұрғаны белгілі болды.

С-HR-дің жаңа буыны Toyota Prius платформасына негізделеді деген болжам бар, күштік құрылымы да аталған модельмен ұқсас болуы мүмкін. Кроссовердің гибрид және толық электрлі нұсқасы шығады. Марка оған іштен жанатын мотор орната ма, белгісіз. Өйткені модельді экологиялық талап қатаң Еуропада сатуды жоспарлап отыр.

Сериялы С-HR-дің сынақтан өтіп жатқанына қарағанда, компания жаңа өнімді биыл жыл аяғына дейін таныстыратын сияқты.