Toyota көктемде жұрт назарына ұсынылған bZ4X электрокроссовері туралы толық мәлімет жариялады. Ол — компанияның «нөл шегінде» (Beyond Zero) бағытындағы машиналарының алғашқы буыны. 11 қарашада таныстырылатын Subaru Solterra-мен TNGA-e платформасын бөлісетін орта көлемді кроссовер екі түрленімде шығарылады.
204 ат күшін беретін жалғыз моторы бар нұсқасы тек алдыңғы жетекті болады, әрі алғашқы жүздікті 8.4 секундта еңсереді. Ал жүзге дейін жылдамдықты 7.7 секундта алатын екі моторлы нұсқасы аса қуатты емес, есесіне әрқайсысы 109 ат күшіне ие қозғалтқыштар толық жетек жүйесімен жұмыс істейді. Екі түрленімге де сыйымдылығы 71.4 кВт/сағ батарея орнатылғандықтан, моножетекті машинаның жүріс қоры көбірек болады (500 км), ал толық жетекті көлікте — 460 км.
Жоғары технологияны бағалайтын жандарға bZ4X-ті авиацияны еске салатын штурвал арқылы басқару ұнайтыны сөзсіз. Дегенмен кроссовер кәдімгі дөңгелек рөлмен де (негізгісі осы) жабдықталады. Сондай-ақ салон өте кең болады, әсіресе алдыңғы қатарда отырғандар оны анық сезінеді.
Интерьердегі өзге ерекшелік ретінде алдыңғы панельге тікелей орналастырылған цифрлы аспаптар панелінің қалқаншасы мен Tesla стиліндегі әдемі мультимедиа планшетін атауға болады. Жапондар көп қолданылатын кейбір функциялар үшін физикалық батырмаларды қалдырды.
Toyota bZ4X Жапонияда 2021 жылы желтоқсан айынан бастап сатылады, ал өзге елдер көлікті келер жылдан бастап кесте бойынша алады. Электромобильдің бағасы жарияланған жоқ, бірақ 40 мың доллардан арзан болмайтын шығар. Басты бәсекелесі Tesla Model Y мен Volkswagen ID.4 болады.
Комментариев: 0