Көпшілік күткендей Toyota Шанхайда bZ4X деп аталатын жаңа буын жол талғамайтын көлігін көрсетті. Мұндағы алғашқы екі әріп «нөл шегінде» (beyond zero) дегенді аңғартса, 4 модельдің иерархиядағы орнын, ал X оның кроссовер екенін білдіреді. bZ4X танымал RAV4-тің ізбасары саналады. Өлшемдері бірдей әрі бір аудиторияға арналады. Тек кейінгісінде экологиялық талаптар көбірек ескерілген.
Жаңа модельдің техникалық сипаттамасы жайлы ақпарат жоқ. Тек e-TNGA платформасында жасалатыны белгілі. Екі оське де электромотор қойылған толық жетекті жүйені Subaru мамандары әзірлеген.
Интерьері жоғары технологияны бағалайтын жандардың көңілінен шығады. Цифрлы аспаптар панелі мен алдыңғы панельдің мата аралас қаптамасы өзгеше көрінеді.
Toyota bZ4X 2022 жылдың ортасынан бастап компанияның Жапония мен Қытайдағы зауыттарында шығарылады. Модель әлемнің барлық еліне арналғандықтан, Қазақстанда да сатылады.
Комментариев: 0