Толық жетекті Geely Atlas саудаға шықты

Былтыр қарашада Geely топтамасы тағы бір кроссовермен толықты. Елімізде автомобиль Atlas деген атау алды, ал басқа нарықта ол Boyue L немесе Starray деген есіммен танымал. Компания Tugella және Monjaro-мен бір платформаны бөлісетін кроссовердің алдыңғы жетекті түрін ұсынған еді, енді толық жетекті Atlas алуға болады.

Модель 238 ат күшін және 350 Нм момент беретін 2 литрлік турбомотормен жабдықталған және моножетекті модификациядан айырмашылығы — 7 сатылы робот орнын 8 сатылы автомат басты.

Толық жетек Atlas-тың екі үздік комплектациясында қолжетімді: Premium және Flagship.

Premium комплектация арнайы ұсыныс пен жеңілдікті есептемегенде 16.8 млн теңге тұрады. Ол қауіпсіздік жүйелерінің толық жинағымен, алдыңғы, бүйірлік эйрбэгпен және қауіпсіздік перделерімен, айнала шолу камерасымен, кілтсіз ашу жүйесімен, рөлді, алдыңғы әйнекті, әйнек жуғыш бүріккішін, алдыңғы және артқы орындықтарды жылытқышпен, екі аймақты климат-бақылаумен, жүргізуші мен алдыңғы жолаушының электрлі реттелетін орындығымен, 10.2 дюймдік цифрлы аспаптар панелімен, 13.2 дюймдік экранмен және 6 динамигі бар медиажүйемен жабдықталды. Көмекші жүйелер кешеніне автоматты тежеу, жолақта сақтау, жолақты бақылау, жол белгілерін тану, бейімді круиз-бақылау және т.б. кіреді.

Flagship модификациясы салонның жақсарған жарықтандыруымен, электр жетегі бар жүксалғыш есігімен, алдыңғы орындықтарды желдетуімен, проекциялы дисплейімен, 9 динамигі бар аудиожүйемен және перфорациялы былғарымен қапталған салонымен ерекшеленеді. Бағасы — 17.5 млн теңге.

Atlas Қазақстандағы Geely топтамасындағы танымал модельдердің бірі. Брендтің ішкі рейтингінде үшінші орынға ие. Биыл алты айда 658 данасы саудаланды. Geely-дің тек Coolray (789 дана) шағын кроссовері мен Emgrand (1196 дана) седаны жақсы өтеді.