Алпауыт компанияның басшысы Акио Тойода ел алдында сөз сөйлегенде автоөндірісті электрлі ету миллиондаған жұмыс орнының босауына түрткі болып, энергетика мәселесін тудыратынын ескерткен. Ал қоршаған ортаның тазалығы үшін күресіп жүргендер ол басқарып отырған компанияға ерекше назар аударды. Бірақ оларды көптен күткен Beyond Zero-ның жарық көруі мүлде қызықтырмаған сыңайлы.
France 24 арнасы БҰҰ-ның климат жайлы саммитінде Greenpeace өкілдері әлемдік автоөндірушілердің ауаға зиян газ таратуды барынша азайту үшін жүргізіп жатқан жұмыстары бойынша рейтинг жасағанын хабарлады. Бұл тізімдегі соңғы орынға Toyota жайғасқан. Ұйым сарапшылары Toyota іштен жанатын қозғалтқышы бар көліктер шығаруын жалғастыру арқылы модельдерін электрлі етуге қарсы екенін білдіріп отыр деп түйді. Ал кезінде ұйымның көңілінен шыққан Prius бұл жолы есепке алынбады, себебі гибрид ІЖҚ-дан аса таза емес.
Айта кетерлігі, «гринписке» ұнамаған Toyota ғана емес, бұл қатарда Stellantis, Volkswagen, Ford, Honda, Hyundai және басқа ірі компаниялар бар. Экологтар декорбонизация бойынша General Motors-ты үздік деп таныды. Алайда мұндай мақтау Мэри Баррдың көңіліне медеу болмайтын сияқты, өйткені GM сатылымы үшінші тоқсанда 33 пайызға төмендеді.
Комментариев: 0