Оңтүстік Кореяның монополияға қарсы қызметі Tesla Inc компаниясына 2.85 млрд вон (2.2 млн доллар) айыппұл салды деп хабарлайды Automotive News. Олар автоөндіруші жарнамада машинаның жүріс қорын тым көбейтіп, ал қуаттауға кететін уақытты азайтып көрсетті деп санайды. Оның үстіне көлік сипаттамасында нөлден төмен температурада жүріс қорын жоғалтатыны жазылмаған.
Корея әділ сауда комиссиясы (KFTC) таратқан ақпаратқа сенсек, суықта Tesla көліктерінің жүріс қоры жарнамадағы көрсеткіштен 51 %-ға төмендеген. Сондай-ақ интернетте −7 °С-та мүлде қуат алмай қойған Tesla Model S туралы ақпарат тарады. Сол үшін көлік иесі Рождествоға арналған жоспарын өзгертуге мәжбүр болыпты.
Мұнда батареясы тозған машиналар туралы сөз болып отырғанын айта кеткен жөн. Ең ескі Model S-тің шыққанына 10 жыл болды, батареяның ұзақ уақыт бойы мінсіз жұмыс істемейтіні түсінікті жағдай. Мұндай мәселе барлық электромобильде кездеседі, қайта Tesla өзге маркаларға қарағанда жақсы нәтиже көрсетіп отыр. Бұған дейін Chevy Bolt, Ford Mustang Mach-E және Volkswagen iD.4 жай суықтың өзінде 30 % жүріс қорын жоғалтатыны белгілі болған, ал Tesla-ның жүріс қоры 15–19 %-ға азаяды екен. Jaguar I-Pace кроссоверінің батареясы суыққа ең төзімді екені анықталды, оның жүріс қоры небәрі 3 %-ға төмендейді.
Комментариев: 0