Tesla компаниясы рестайлингтен өткен Model Y-ға арналған Acceleration Boost деп аталатын сымсыз жаңарту жүйесі шыққанын хабарлады. Екі мың доллар төлеп, моторға 100 ат күшін қосуға болады. Ал Xiaomi бренді SU7 Ultra иелері шағымданған соң қозғалтқыш қуатын екі есе кемітетін жаңа бағдарламасын алып тастады.
Америкалық компания ақылы жүйенің арқасында көлік 4.2 секундта 60 миль жылдамдық алады деп мәлімдеді. Басылымдар бұл Model Y Juniper алатындардың санын арттырады деп болжады, оның үстіне бұл Model Y Performance моделін ұсынар алдындағы өтпелі кезең болғалы отыр.
Xiaomi SU7 Ultra-ға келер болсақ, оның моторлары 1548 ат күшін беруге қабілетті, бұл алғашқы жүздікті 2 секундқа жетпейтін уақытта еңсеруге мүмкіндік береді. Бірақ компания мұндай машинаны тәжірибесі аз жүргізушінің тізгіндеуі қауіпті деген шешімге келіп, мотор қуатын шектеді (900 а.к.).
Күштік құрылымның бар мүмкіндігін пайдалану үшін көлік иесі фирма таңдаған жарыс тректерінің бірінде біліктілігін дәлелдеуі керек. Одан бөлек, жаңа бағдарлама 60 секунд кідірген кезде лаунч-бақылау функциясын қолдануға жол бермейді. Xiaomi осылайша бағдаршамда жарысатындардың жолын кеспек болған.
Қытайдағы басылымдар бұл SU7 Ultra иелеріне ұнамай қалып, арыз-шағым көбейді деп жазды. Электрокар алғандар бренд бір машинаны жарнамалап, мүлде басқасын сатқанына ашуланған көрінеді. Салдарынан Xiaomi халықтың қауіпсіздігін ойласа да, даулы жүйеден бас тартатынын және болашақта жаңа функцияларға қатысты толық ақпарат беретінін хабарлады.
Комментариев: 0