Tesla Model S 2012 жылы алғаш көрсетілді, содан бері үздіксіз өзгеріп келеді. Жаңа жиынтық түрлері пайда болып, батарея көлемі мен қуаты артты. Ал 2021 жылы электромобиль өз тарихында алғаш рет күрделі деңгейде түрленді. Model S интерьері толық жаңарды.
Салонда ең алдымен көзге түсетін — дисплей. Бұрынғы вертикалды экранның орнын 17 дюймдік көлденең экран басқан. Model Y мен Model 3-тегі дисплей де сондай, бірақ компания өкілдері мынау әлдеқайда күшті дейді. Бұл дисплейдің түстері жарқын, жылдам жауап береді және тұнықтығы 2200×1300 пиксель.
Штурвалға ұқсайтын футуристік рөлі де көз тартады. Оның бетінде шам мен бұрылыс көрсеткішін қосатын тетіктер жоқ. Салонда қозғалыс режимін ауыстыратын селектор да көрінбейді. Артқы бөлігіне бүйірлік тірегіші жақсартылған орындықтар мен жеке дисплей орнатылған.
Model S агрессивті кейіпке еніп, жаңа дөңгелектерге ие болды. Одан бөлек шеберлер көліктің аэродинамикасын жақсартыпты.
Model S-тің анағұрлым қуатты нұсқасы бұдан былай Plaid деп аталады. Ол ең жоғарғы қуаты 1020 күшке жететін үш мотормен жабдықталған. Алғашқы жүздікті 1.99 секундта алады. Жүріс қоры — 628 шақырымға жуық. Кейінірек 840 шақырым жолды еркін еңсеретін Plaid+ деген нұсқасы пайда болады.
Жаңартылған модель бірнеше аптадан соң өндіріле бастайды. Кейінірек Model X-тің де интерьері өзгереді. Электрлі кроссовердің суреті Tesla сайтында жарияланды.
Комментариев: 0