Tesla «кибертракты» алып-сатуға тыйым салды

Tesla 30 қарашада Cybertruck-тың алғашқы партиясын иелеріне жөнелте бастайды, бірақ оның алдында сатып алу келісімін жаңартты. Пикапты сатып алған күннен бастап бір жыл ішінде қайта сатуға тыйым салатыны туралы жаңа шарт пайда болды. Клиент өз құқығын талап етсе, алдымен автомобиль өндірушіден жазбаша рұқсат алып, оған көлікті кері сатып алу туралы басым құқық беруі керек.

Келісімшарт ережесін бұзған жағдайда компания клиентке 50 000 доллар көлемінде айыппұл салуға құқылы.

Алыпсатарларға қарсы шара автобизнес үшін таңсық нәрсе емес. Кезінде Ford өзінің үшінші буын GT суперкарына және General Motors алғашқы Hummer EV-ге қатысты осындай талап қойған. Porsche бренді 911 сияқты шектеулі топтамаларына осыған ұқсас саясат қолданады және қазіргі таңда жаңа 911 S/T тек 12 айға жалға беріледі.

Дегенмен, Cybertruck-ты эксклюзив өнім деп есептеу қиын, себебі оған алдын ала берілген өтінім саны 2 миллионнан асты және компания жыл сайын жүздеген мың данасын шығаратын болады. Бұл шарт тек жаңа өнімге деген қызығушылықты арттыру үшін жасалған болуы мүмкін екенін жоққа шығаруға болмайды.