Tesla иесі шатасып, бөтен көлікке мініп кетті

Tesla Model 3 пен Ванкувер тұрғыны қызық оқиғаның кейіпкері болды. Раджеш Рандев есімді азамат қатар тұрған электрокардың біріне мініп, бірнеше шақырым жол жүргеннен кейін ғана оның бөтен кісінікі екенін түсінген. Полиция Раджешке еш сұрақ қоймағанмен, ол Tesla-ға шағымданды.

Раджеш Рандев жергілікті БАҚ өкілдеріне балаларын мектептен аламын деп асығып, қателескенін айтты. Оның үстіне қатар тұрған екі Model 3-тің түсі бірдей екен. Ол өз смартфонымен бөтен адамның көлігін қалай ашқанына таң.

Өз машинасына мінбегенін алдыңғы әйнектегі сызатты көргенде және телефон қуаттағышты әдеттегі орнынан таппаған соң түсінеді. Сол уақытта ол тізгіндеп бара жатқан электромобиль иесі де хабарласады. Сөйтсе, Раджеш өз машинасында телефон нөмірі жазылған құжаттар қалдырған екен.

Келеңсіз жағдайға тап болған қос тұрғын бір күліп алыпты. Көп ұзамай Раджеш полицияға арыз жазады, бірақ олардан қайыр болмапты. Болған жайды Tesla-ға да хабарлайды, алайда компания әлі жауап бермеген.