Tesla Cybertruck жол апатына түсті

Конвейерге күні кеше тұрған Tesla Cybertruck бүкіл желіні шулатып жатыр. 2023 жылдың аяғында электропикап Калифорнияда апатқа түсті деген ақпарат тарап, куәгерлер оқиға орнынан түсірген суреттер жарияланды.

Ресми мәліметке сүйенсек, Пало-Альто қаласында болған апаттан ешкім зардап шекпеген. Полицейлер оған Toyota Corolla тізгіндеген 17 жастағы жігіт себеп болғанын айтты. Жүргізуші жаңбырдан кейінгі тайғақ асфальтта рөлге ие бола алмай қалып, қарсы бетке өтіп кеткен, дәл сол сәтте алдынан Cybertruck шығыпты. Бүйірден тиген соққыдан электрокардың есігі, қанаты және пластик арка кеңейткіші бүлінген. Тағы бір фотодан қауіпсіздік пердесі ашылғаны байқалады.

Cybertruck-ты Tesla қызметкері жүргізген екен, бірақ ол прототип пе, әлде инженердің жеке көлігі ме, белгісіз.