Tesla Cybertruck спорткар сияқты жүреді

Tesla Cybertruck тұсаукесері жақында өтеді, компания қызметкерлеріне ресми іс-шараға арналған арнайы форма беріп қойған. Қазірге дейін пикап туралы көптеген ақпарат шықты, бірақ оның бәрін сенімді дерек деуге келмейді. Дегенмен машинаның қуаты ешкімнен кем емес сияқты.

Пикаптың жылдамдығы аса жоғары екенін желіде тараған видео растады. Бортында RC (Release Candidate) деген жазуы бар салмағы үш тонна болатын сериялы өндіріске дейінгі Cybertruck бағдаршамда керемет қарқынмен қозғалды. Әрине, драгстер емес. Бірақ қуаты өте жақсы екені байқалады.

Алдын ала тапсырыс берген екі млн клиенттен бұрын қазір қолда бар жалғыз Tesla Cybertruck-ты сатып алуға болады. Машина осы сенбіде Петерсен автомобиль мұражайының дәстүрлі гала-концерті кезінде аукционға шығады. Ерекше көліктің бағасы өте жоғары болуы мүмкін деген болжам бар, өйткені іс-шараға қатысу құны 30 000 долларға жетуі мүмкін.