Tesla басшысы Илон Маск III тоқсанның қаржылық есебінен кейінгі сұрақ-жауап сессиясында компания Model Y және Model 3-тен арзан электрокар шығармайтынын айтты. Model 2 деп аталатын бюджеттік Tesla жарық көретіні жайлы 2018 жылдан бері айтылып жүрген, енді нақты ақпарат белгілі болып отыр.
Tesla Model 2-нің бағасы 25 000 доллардан басталады деген болжам болған. Бұл модель қашан шығатыны туралы сұраққа Илон Маск мұндай концепцияның ақылға қонбайтынын айтты. Tesla басшысы бұл идея компания ұстанымына қайшы деп санайды.
Tesla қазір автономды басқару технологиясын дамытуға баса мән беріп отыр. Илон Маск автопилот автоөндірістің болашағын айқындайды деп санайды. Демек толық басқару элементі бар арзан батареялы хетч жасау бизнесменнің қазіргі стратегиясына сәйкес келмейді.
Tesla жақында таныстырған Cybercab робототаксиінің бағасы арзан сегментке сай келеді. Екі орынды электрокарда рөл мен педаль болмайды, ол толықтай автономды жүйемен жүреді. Tesla осы модель негізінде робототакси сервисін ұйымдастыруды әрі Cybercab-ты жеке клиенттерге сатуды жоспарлап отыр. Илон Маск Tesla 2027 жылға қарай жүргізушісіз көлік өндірісіне кірісетінін айтқан, бірақ сала мамандары бұған күмәнмен қарап отыр. Өйткені толық автономды жүйені енгізуге қазіргі технологияның дамуы мен нормативтік база мүмкіндік бермейді. АҚШ заңдарына сай жүргізушісіз немесе басқару элементі жоқ көлік құралы жалпыға арналған жолмен жүре алмайды.
Комментариев: 0