Тас жолда «Мал айдап өту» белгісі пайда болды

Мамандар шаруа қожалықтары жақын орналасқан трассаның 102-шақырымына арнайы сезгек пен жануарды байқаған кезде қосылып, жыпылықтай бастайтын электроника орнатты. Жоба сынақтан жақсы өтсе, «Қазавтожол» оны басқа да республикалық маңызы бар трассаларға орнатады.

Кешенді әзірлеген отандық компания оны «Қорғау» — «Защита» деп атады. Ол жүргізушілерге күндіз де, түнде де, кез келген ауа райында ескерту жасайды екен. «Қорғау» сезгегін бір-бірінен бір жарым шақырым қашық орналастырды. Кешен екі қағида бойынша жұмыс істейді:

1. Таратқыштан қабылдағышқа жіберілген радиотолқын жануарға түсіп,белгі береді. Қабылдағыш толқын параметрлерін белгілеп, жерасты сымы арқылы жарық-дыбыс құралын қосу үшін бекеттерге импульс таратады.
2. Байланысты басқару модулі бекеттер мен қарсы беттегі барлық құрылғыны іске қосады.

Мамандардың сөзінше электроникаға бұзақылардың қолы жетпейді:

• жарықдиодты жол белгісі жерден үш метр қашықтықта орналасады;
• сары бағдаршам мен күн панелі төрт метр биік тұрады;
• дыбыс қабылдау және тарату модулін мамандар келешекте кемі 2.5 метр биік қояды.

Жануарды жолдан қуатын «электронды көмекшілерді» тәжірибе жүзінде Маңғыстау облысына орнатқан еді, жолшылардың сөзіне сенсек, құрылғыны жергілікті тұрғындар тасып бітірген. Жол белгісін қайта ілгенмен, ұрлық азаймай тұр.

2022 жылы төрт түліктің қатысуымен болған көлік апатынан көп адам қаза тауып, жүзден аса отандасымыз жарақат алған.