Тайваньда гибрид мопед шығады

Электросамокат пен 50 кубтық мопедтен бастап 500 кубтық моторы бар макси-скутерге дейінгі түрлі мототехника өндіретін SYM компаниясы PE 3 деп аталатын жаңа жобасын көрсетті. Ол гибрид мопедтің концептісі.

Гибрид скутер жаңалық емес. Олар Yamaha және Honda сияқты компаниялардың топтамасында бар. Жапониялық брендтер стартер-генераторы бар жұмсақ гибрид схемасын пайдаланса, SYM қиын жолды таңдап, тізбекті гибрид құрастырды. PE 3 ықшам батареядан қуат алатын 5.5 ат күші бар шағын электрлі мотормен жүреді. Аккумулятор қуаты белгілі бір деңгейге төмендесе, іштен жанатын қозғалтқыш генератор ретінде жұмыс істейді.

Электр қуатымен SYM PE 3 35 шақырымды еңсере алады, ал қайта қуаттаусыз және жанармай құймай жүріс қоры 305 шақырымға жетеді.

PE 3-тің сериялық нұсқасы қашан шығатыны әзірге белгісіз, БАҚ мәліметтеріне сүйенсек, компания концептіні тауар түріндегі мопедке айналдыруға ниетті.