Тағы бір қалада трамвай тоқтауы мүмкін

Жеті жыл бұрын бірнеше ірі жол апаты мен дау-дамайдан кейін Алматыда трамвай жұмысы тоқтаған. Енді Теміртауға кезек келген сияқты. Sputnik.kz хабарлағандай, оған иелік ететін «АрселорМиттал Теміртау» электрлі транспорт компанияға пайда әкелмейтінін мәлімдеді.

«Трамвай металлургтер мен қала тұрғындарын таситын. Қазір жұмысшыларды „АрселорМиттал Теміртау“ комбинатына арнайы автобустармен жеткізіп жатырмыз. Кейінгі онжылдықта трамвай паркі тиімсіз болып қалды» дейді компания өкілдері.

Металлургтер «АрселорМиттал Теміртау» қызметкерлері трамваймен тегін жүргенін, ал өзге жолаушылар өте аз мөлшерде жолақы төлейтінін айтады. Сондай-ақ трамвай паркін күтіп ұстау орасан зор шығынды талап етеді. Мысалы, ескірген, жолаушы тасуға қауіпті вагондарды толығымен ауыстыру қажет. Осыған байланысты трамвай қозғалысын тоқтатып, техникалық тексеріс жүргізу туралы шешім қабылданды.

11 ақпанда біреулер 600 метр трамвай жолы кабелін ұрлап кетіпті. Ұрылар тағы қолды етпеу үшін жауаптылар қалған кабельді жинап алу туралы шешім шығарды.

Компания трамвай желісіне техникалық тексеріс жүргізіп, сараптама жасайды және жоба дайындап паркті Теміртау қаласы әкімдігінің балансына береді. Ал қала билігі электр транспортты жалғасты жүргізе ме, белгісіз.

Теміртау трамвай паркі 60 жылдан бері жұмыс істеп тұр. Оның қызметін уақытша тоқтатып, тексеріс жүргізу туралы әңгіме биыл қаңтарда шыққан. Қала тұрғындары қоғамдық көлік әдеттегі бағытымен жүре береді деп үміттенген еді, бірақ олай болмайтын секілді.

Елде жеңіл рельсті көлік тұрақты жүріп тұрған қалалар да бар. Мысалы, Павлодар кейінгі бес жылда 23 дана АКСМ-802Е трамвайын сатып алды.

Ал биыл қаңтарда Өскеменде бірнеше жаңа трамвай жолға шықты.