Suzuki Jimny Еуропадан кетеді

Suzuki Германияда Jimny-дің Horizon деп аталатын арнайы нұсқасын таныстырды. Бұл нарықпен қоштасуға арналған түрленім — экологиялық стандартқа байланысты модель Еуроодақтан кетті. Мұндай машинаның 900 данасы ғана шығады, содан соң модель саудасы тоқтайды. Бірақ біржола емес, Suzuki ізбасар дайындап жатыр.

Марка Jimny Horizon үшін аксессуарлар жинағын әзірледі, бұл жол талғамайтын көлікке винтажды көрініс сыйлайды. Атап айтқанда, Suzuki жазуы бар радиатор торы, ерекше шамы және қара түсті болат дөңгелек пен лай шашыратқыш бар. Бампер мен табалдырықтағы қорғаныс тақтасы жолсызға арналған мүмкіндігін арттыра түсті. Арнайы нұсқа қосалқы дөңгелек қаптамасы және фаркоппен жабдықталған. Мұндай Jimny қара және болат сұр түске боялады.

Салоны мен техникалық бөлігінде қандай өзгеріс болатыны белгісіз. Еуропада Suzuki Jimny 5 сатылы механика қорап және толық жетек жүйесімен жұмыс істейтін 102 ат күшіне ие (130 Нм) 1.5 литрлік атмосфералы мотормен жүреді. Бірнеше жыл бұрын нарықта табан тіреп тұру үшін Suzuki Еуропада Jimny-ді жеңіл коммерциялық көлік санатына ауыстыруға мәжбүр болды, сол мақсатта артқы диванды алып, жүксалғыш пен алдыңғы орындық арасында ашық орын қалдырды. Модельге қазір бұл шешім де көмектеспейтін сияқты.

Suzuki Jimny-дің бензин-электрлі түрленімін дайындап жатыр, жаңа нұсқа модель рестайлингтен өткен кезде жарық көреді. Ол үнемді әрі қоршаған ортаға зияны аз болады, Еуроодақ мұндай Jimny-ге шағым түсірмейтіні анық. Жаңарған жол талғамайтын көліктің нақты қашан шығатыны қазірше белгісіз.