Subaru компаниясы Legacy седанының Солтүстік Америка нарығына шығатын жаңарған нұсқасын таныстырды. Марка инженерлері мен дизайнерлері көп бас қатырғысы келмесе керек, шанақтың металл элементтеріне тиіспепті. Олар жарық техникасын, радиатор торы мен бамперін ауыстырған, содан модель сәл агрессивті көрінеді. Оның бұл образын жаңа дизайндағы жеңіл балқытылған дискілер толықтырып тұр. Ал артқы бөлігінде еш өзгеріс жоқ.
Салоны бұрынғыдай, бірақ әрлеу материалдары біраз жақсарған. Мысалы, үздік нұсқадағы көліктің рөлі күміс түстес тігісі бар наппа былғарысымен қапталады. Енді рөл толық жылынатынын, ал 11.6 дюймдік дисплейі бар мультимедиа кешені Apple CarPlay және Android Auto-мен жұмыс істейтінін де айта кеткен жөн. Толық комплектациялы машиналар жолда күтпеген жерден кедергі пайда болғанда рөлді бұра алатын және монокамерасы бар EyeSight электронды көмекшілер кешенімен жабдықталады.
Мотор гаммасында 182 ат күшіне ие 2.5 литрлік қозғалтқыш пен 260 ат күшін беретін 2.4 литрлік турбомотор аталады. Соңғысы енді үздік Limited XT мен Touring XT-ге ғана емес, қарапайымдау Sport нұсқасына да қойылады. Екі агрегат та вариатормен және фирмалық толық жетек жүйесімен жұмыс істейді.
Жаңарған Legacy АҚШ нарығына биыл күзде шығады. Бағасына қатысты ақпарат жоқ.
Legacy-дің қазіргі буыны Қазақстанға келеді деп күтудің қажеті жоқ. Марканың елдегі модельдік топтамасы бірнеше жылдан бері XV, Forester және Outback-пен шектеліп тұр. Бағалары 15.1 млн теңгеден басталып, 24 млн-ға дейін барады.
Комментариев: 0