Stellantis рамалы электромобиль шығарады

Stellantis рамалы модельдерді электр жетекке ауыстыруға мүмкіндік беретін STLA Frame платформасы туралы ақпарат берді, онда жол талғамайтын көлік, пикап және жеңіл коммерциялық техника жасалады. Платформа сегменттегі ең көп жүріс қорын және түрлі типтегі қозғалтқыш пайдалану мүмкіндігін қамтамасыз етеді.

STLA Frame-ге негізделген рама берік болаттан жасалады, ал аккумулятор соның ішіне орналасады. Яғни рама элементтері қосымша қорғаныш рөлін атқарады. Сериялы модельдер сыйымдылығы 159-200 кВт⋅сағ болатын аккумулятормен жүреді.

Бұл платформадағы электрлі жол талғамайтын көліктердің жүріс қоры 800 шақырым болады. STLA Frame генератор ретінде дәстүрлі мотор орнатуға мүмкіндік береді, соның арқасында жүріс қоры 1100 км-ге жетеді. Әзірлеушілер бұл сегменттегі рекордтық көрсеткіш екенін айтты. Электромотор жайлы ақпарат бар, Stellantis агрегаттары 340 ат күшін береді, мұндай моторы бар жол талғамайтын көлік алғашқы жүздікті 4.4 секундта еңсереді.

STLA Frame пневматикалық элементі бар толықтай тәуелсіз аспаның әр түрін пайдалануға жағдай жасайды. Мұндай машина 1.2 тоннадан аса жүк көтереді. Электромобиль де, гибрид те тереңдігі 610 миллиметрге жететін шұңқырдан өте алады. Сондай-ақ ұзындығы 5.5-6 метр, дөңгелек базасы 3.15-3.7 метр болатын әртүрлі өлшемдегі машиналар жасауға болады.

Jeep Wrangler-дің келесі буыны жаңа платформаға негізделе ме, жоқ па, белгісіз. Ал Ram маркасы 1500 Revolution пикабының электрлі және гибрид нұсқасын шығарады. Stellantis STLA Frame-де дәстүрлі мотормен жүретін, гибрид және сутекті машина шығаруды жоспарлап отыр.