SsangYong-ның бұрын J100 аталған кроссовері енді Torres атауымен шығады, жаңа машина сериялы өндіріске дайын. Көліктің сыртқы пішінінде өзге маркалармен ұқсас тұсы көп, мысалы, Jeep үлгісіндегі радиатор торы, Ford Explorer-ді еске салатын шамы, Land Rover-дегі секілді қосалқы дөңгелек астындағы бастырма. SsangYong машинасын өзгелерге еліктеп жасағанды ұнатады, өйткені олар дизайнға келгенде аса мықты емес.
Жаңа өнімді сатып алатындар үшін артық таңдау жоқ. Машина бір ғана бензинді мотормен ұсынылады, ол — 170 ат күші бар 1.5 литрлік 4 цилиндрлі T-GDI, беріліс қорабы да жалғыз — 6 сатылы автомат, көлік алдыңғы жетекті. Ал толық жетек опция ретінде қолжетімді. Зауытта 17 немесе 18 дюймдік дөңгелек орнатылады, бірақ оны 20 дюймдік дискіге ауыстыруға мүмкіндік бар.
Салонда да тосын сый жоқ. Ұзын аспаптар панелі, 12.3 дюймдік ірі мультимедиа планшеті, оның астында жаңа Land Rover стилінде жасалған климат бақылауға арналған 8 дюймдік тачскрин бар. Комплектациясына байланысты жабдықтар тізімінде көмекші жүйелер кешені (ADAS), 6 динамигі бар аудиожүйе, желденетін орындық, 7 қауіпсіздік жастығы және т.б. бар. Артқы орындықты жатқызған кезде жүксалғыш сыйымдылығы 703 литрден 1662 литрге артады.
Оңтүстік Кореяда SsangYong Torres-ке қазірден бастап тапсырыс беруге болады, бағасы 20 911-23 630 доллар аралығында, көлік шілдеде жеткізіле бастайды. Шпиондық фотосуреті жарияланған электр жетекті нұсқасы жайлы айтсақ, ол Еуропа нарығы үшін келер жылы дайын болады.
Комментариев: 0