«Соколда» драг-рейсингтен турнир өтеді

Демалыс күндері Қазақстанда драг-рейсингтің жаңа маусымы басталады. Турнирдің Sokol Drag Wars аталатын бірінші кезеңі 30 сәуірде Алматы-Астана тас жолының 76-шақырымында өтеді.

Шабандоздар жетек түрі немесе қозғалтқыш қуатына емес, ширек мильді қанша уақытта еңсеретініне қарай бес класқа бөлініп, жарысқа түседі. Ең жәй жүретін көліктер категориясындағы стандарт автомобильдер мильдің төрттен бірін 13-14 секундта бағындыруға тиіс, ал Pro Unlim деп аталатын аса жылдам темір тұлпарлар 10 секундта 402 метр жүріп өтеді.

Іс-шараға қатысу ақылы: трибунадағы орынға 5000 теңге төлейсіз (7 жасқа дейінгі балалар, мүмкіндігі шектеулі жандар мен зейнеткерлер тегін кіреді), егер техпаркке кіруге рұқсат беретін Gold билет алғыңыз келсе, қалтаңыз 10 000 теңгеге жұқарады (жас бойынша шектеу 8+).

Жарыс 30 сәуір күні 13:00-де басталады.