Шымкент қаласы Құрсай ауданында жолға асфальт төселді, алайда бұл жаңалық жергілікті тұрғындарға қуаныш сыйлаған жоқ. КТК телеарнасы хабарлағандай, тұрғындар жол сапасына наразы. Олар тіпті жол жөндеушілердің жұмысын тоқтатып тастаған.
— Шағал төкті, бірақ оны таптап тегістеген жоқ. Жай ғана төге салды, асфальтты топырақ үстіне төсеп жатыр. Жолшылардың техникасы жүріп өткен соң жолда ойықтар пайда бола бастады. Нөл сапа! — деп ашуланды жергілікті тұрғын.
Тұрғындар жаңа жол жабынын жаңбыр шайып кете ме деп қорқады. Мердігер де, қала билігі де халықтың шағымына құлақ аспай, мәселені бір-біріне сілтеп отыр.
Жергілікті жолаушылар көлігі және автомобиль жолдары басқармасы 12 шақырым жолға 773 млн теңге бөлінгенін хабарлады, мамандар жол сапасын қатаң қадағалайды, егер кемшілік табылса, мердігер компания бәрін қайта жөндеуге міндетті.
— Бәрі мінсіз деп айта алмаймын. Тұрғындар топырақ үстіне асфальт төселгенін айтып отыр. Ондай жерді қайта жөндетеміз. Бірақ жұмыс толықтай сапасыз емес. Бүгін таңертең тексерушілерді жібердік. Олар тексеріп, жұмысқа кірісуге рұқсат берді, — деді Шымкент қалалық жолаушылар көлігі және автомобиль жолдары басқармасының бас маманы Фарида Құрбанова.
Жұрт наразылығына қарамастан жолға асфальт төселді. Бірақ сапасы сын көтермейді. Асфальтты жалаң қолмен көтеріп алуға болады.
Комментариев: 0