Жақында пайдалануға берілген Бұқтырма су қоймасы арқылы өтетін көпір Күршім, Көкпекті, Марқакөл, Катонқарағай, Тарбағатай және Зайсан аудандарын қосады.
Екі жолақты көпірдің ұзындығы — 1316 метр. Көпірге 18 шақырым жаңа жолдар жалғанды, тәулігіне 80 мыңға жуық автокөлік өтеді. Қауіпсіздікті қамтамасыз ету үшін екі жағынан 40 арнайы мұзжарғыш орнатылған. Бейнекамералар арқылы тәулік бойы жағдайды бақылауға болады.
Жобаның жалпы құны 60 млрд теңгеден асты (немесе қазіргі валюта бағамы бойынша 122 млн 240 мың доллар) деп хабарлады Көлік министрлігі. Көпірдің кейбір жері 25 метр тереңдікке жетеді.
Құрылыс 2021 жылы басталғанымен, дайындық 2017 жылы жарияланған еді. Бір апта бұрын көпірдің беріктігін тексеру үшін жалпы салмағы 450 тонна болатын 15 жүк тиелген көлік өтті. Арнайы сезгектер деформация, діріл және жүктеме көпірге қалай бөлінетінін тіркеді. Көпір сынақтан сәтті өтті.
Бұл жерде көпір не үшін қажет болды?
Бұрын тұрғындар мен жүк көлік жүргізушілері Бұқтырма мен Ертіс өзенін күн жылы кезде пароммен кесіп өтетін (жеңіл көлік үшін шамамен 1500 теңге және үлкен жүк көліктері үшін бір бағытқа 40 000 теңгеге дейін), ал қыста мұз арқылы жүретін. Жыл сайын мұз толық қатпай тұрып ресми өткел ашылуын күтпей, су қоймасын кесіп өтуге тырысқан кем дегенде он шақты көлік суға батып кететін.
Жолды Өскемен мен Алтай немесе Зайсан көлін айналып өтуге болатын, бұл жолдар ұзақ әрі жақсы жағдайда емес.
Жазда пароммен бір жағадан екінші жағаға өту екі сағатқа дейін созылатын. Енді көпір арқылы Бұқтырманы бірнеше минутта және жылдың кез келген уақытында кесіп өтуге болады.
Комментариев: 0