В ВКО авто с чётными и нечётными номерами будут ездить в разные дни

ШҚО-да тақ және жұп санды нөмірі бар көліктер кезекпен қозғалады

Осылайша билік көшедегі көлік санын азайтпақ.

Өскемен және Семей аумағында коронавирустың таралуына қарсы шектеу шаралары 2 сәуір 00:00-де енгізіледі. Аталған қалаларға бұрын сыртқа шығып кеткен тұрғындардың оралуына және қалада жүрген басқа өңір тұрғындарының кері қайтуына ғана рұқсат беріледі. Көлік пен халықтың қозғалысын бақылау үшін Өскеменде 7, Семейде 8 бақылау-өткізу бекеті орнатылады. Тұрмысқа аса қажет тауарлар мен дәрі-дәрмек, азық-түлік, қорғаныс құралдары, гигиеналық заттар және жанар-жағармай таситын көліктер жасыл дәліз арқылы өтеді.

«Қызметтік машиналарды қоспағанда, автокөлік қозғалысы күндізгі уақытта шектеліп, түнде тоқтатылады. Қоғамдық көлік тек арнайы рұқсатқағазбен қозғалады. Жұмысын жалғастыратын мекемелер мен ұйымдардың қызметкерлері жұмысқа тек қызметтік көлікпен қатынайды. 6 сәуірден бастап жеке көлік қозғалысына шектеу қойылады», — деп мәлімдеді өңір басшысы Даниал Ахметов.

Автокөлік қозғалысын шектеуді бақылау 49 негізгі магистральді қиылыс (Өскеменде — 25, Семейде — 24) арқылы жүзеге асады. Күнтізбенің жұп санды күндерінде 0-ді қоса алғанда, тек жұп санға аяқталатын нөмірге ие көліктер, ал тақ санды күндері тақ санға аяқталатын нөмірге ие көліктер еркін қозғалады. Сонымен қатар, 6 сәуірден бастап екі қаланың тұрғындары тек рұқсатқағазбен ғана жүреді.