Тіркеу-емтихан қабылдау бөлімдерін жабу туралы шешімнің қабылданғанын кеңейтілген отырыста ҚР ішкі істер министрі Ерлан Тұрғымбаев мәлімдеді. Қазақстан Республикасы ІІМ-нің баспасөз қызметі хабарлағандай, ІІМ-нің бастамасымен қолға алынған жаңа ереже мамандандырылған ХҚКО-дағы ТЕБ орындарын жабу, сонымен қатар теориялық және практикалық емтихандарды өткізу міндетін мемлекеттік корпорацияларға беруді талап етеді. Бұл ретте автокөлікті тіркеу үшін қажет құжаттардың бар-жоғы туралы ақпаратты полиция салық, кеден және т.б. органдардың деректер базасынан онлайн режимде, яғни қашықтықтан тексеретін болады.
Осылайша, жүргізуші куәлігін беру және көлікті тіркеу бойынша қызметтер көрсету барысында полицияның азаматтармен және мемлекеттік корпорация қызметкерлерімен ешқандай байланысы болмайды. Полиция қызметкерлерінің арасында құжаттарды тексеру жұмыстары автоматты режимде, яғни адами фактордың алдын алу үшін таңдау мүмкіндігінсіз жүзеге асырылады.
Сонымен қатар, көлік құралдарын бастапқы тіркеу барысында тексеру процедурасы болмайды деп болжануда. Бір-екі жыл бұрын Қазақстанда есепте тұрған автокөліктерді (1 млн-ға жуық) қайта тексеру шарасының күші жойылған болатын. Енді ҚР ІІМ ӘПК мен ҚМ МКК-нің ақпараттық жүйесі біріктірілгеннен кейін, Қазақстан Республикасына қайта кіргізілген автокөліктерді бастапқы тексеру шарасының да күші жойылмақ. Себебі көлік құралдарын алдын ала тексеру мен кедендік тазалауды Мемлекеттік кірістер комитеті, ал қайта тексеруді ІІМ-нің аумақтық органдары жүргізетін болады.
Көлік құралының сәйкестендіру деректерін ІІМ-нің ақпараттық жүйесіне енгізу және көлік құралын тіркеуге кедендік тазалау барысында кедендік органдар берген құжаттар мен Кедендік одақ елдерінде рәсімделген төлқұжат және көлік құралын тіркеу туралы куәлік негіз болады.
Комментариев: 0