Семейде мас велосипедші қамалды

Электровелосипед тізгіндеген ер адам Семейдегі Молдағалиев көшесімен жүріп бара жатыпты. Абай облысының полиция департаментінің баспасөз қызметі 42 жастағы тұрғыннан алкоголь иісі шығып тұрған, сол үшін полицейлер оны медициналық тексерістен өтуге жіберді, нәтижесінде аздап мас екені анықталды деп мәлімдеді.

Ұсталған кісінің жүргізуші куәлігі жоқ екен, тәртіп сақшылары оны 20 тәулікке қамап, 7 жылға дейін құжат алу мүмкіндігінен айырды. Ал техникасын айыптұраққа жіберген.

Еске салайық, «Жол жүрісі туралы» заңға сәйкес велосипед (электрлі моторы бар түрі де) көлік құралы саналады.

Әкімшілік кодекстің 608-бабына сай мас күйде (алкоголь, есірткі тұтынып) көлік құралын мінгендерге арнайы жаза бар. Жүргізуші куәлігі жоқ азамат 20 тәулік темір торда отырады.

Жол жүрісі туралы заңның 74-бабында Әкімшілік кодекстің 608-бабы, 6-бөлігі (арнайы куәліксіз көлік тізгіндеу) немесе 613-баптың 9-бөлігі (куәлігі жоқ тұлғаның медициналық тексерістен өтуден бас тартуы) бойынша ұсталған адам 7 жыл бойы құжат алу үшін емтихан тапсыра алмайды деп жазылған.