АВТОВАЗ-ға Nissan компаниясынан қалған кәсіпорын өз жұмысын бастады және машина құрастыруға кірісіп кетті. Бұл сөзімізге Lada X-Cross 5 кроссоверінің алғашқы легі дәлел бола алады. Бұл — өңі өзгерген FAW Bestune T77. Drom.ru порталы алаңда тұрған бірнеше көліктің суретін жариялады.
Бұл серия алды нұсқа болса керек, себебі АВТОВАЗ басшылары жаңа машиналарды маусымда шығарамыз деп уәде берген.
Қазақстанда FAW Bestune T77-нің бағасы 12 млн теңгеден басталады. Алдыңғы жетекті автомобиль 160 ат күші мен 258 Нм момент беретін бензинді қозғалтқышпен жүреді. Агрегат 7 сатылы роботпен жұптасып жұмыс істейді. Lada атауымен шығатын модельдегі күштік құрылымның қуаты төмен болуы мүмкін.
Drom.ru Lada Ресейде ғана емес, Еуразиялық Одақ елдеріне де сатуға рұқсат беретін сертификат алғанын жазды. Кроссовер Қазақстан автосалондарына келетінін жоққа шығаруға болмайды. Марка үйреншікті модельдерін біздің елде сата алмайды. Арзан Lada Granta, Vesta мен Niva-ның экологиялық класы төмен болғандықтан, алғашқы тіркеу үшін қойылатын жергілікті талаптарға сай келмейді.
Комментариев: 0