Естеріңізге сала кетейік, 2018 жылдың 28 қыркүйегінде сағат 12:00 шамасында 28 жасар алматылық ер адам Әл-Фараби даңғылының бойында орналасқан «Бавария» автосалонындағы Rolls-Royce көлігін оталдырып, орнынан қозғала бере витражды соққан болатын. Полиция қызметкерлері оның бұл сәтте есірткіге мас болғанын хабарлаған еді. Сараптама жүргізген мамандар шетелдік көліктің жөндеу құнын 43 278 514 теңгеге, ал шағылған әйнекті қайта қалпына келтіру құнын 1 997 829 теңгеге бағалаған.
Кінәліге ҚР ҚК-нің 202-бабының 3-бөлігінің 2-тармағында көрсетілгендей, бөтеннің мүлкін қасақана бүлдірген деп айып тағып, оны сотқа берген болатын. Алайда сот-медициналық тексеру қорытындысы ер адамның " АХЖ 10 F20.0 бойынша параноидты шизофрения түріндегі психикалық ауытқуы болған әрі бар және оған айып тағылған кезеңде ол өз әрекетінің іс жүзіндегі сипаты мен қоғамға қауіптілігін ұғына алмаған немесе оған ие бола алмаған. Қазіргі таңда психикалық жағдайына байланысты тергеу мен сот алдында жауап бере алмайды және жалпы типтегі психиатриялық стационарда мәжбүрлі түрде емдеу қолдануға мұқтаж" екендігін көрсетті.
Нәтижесінде, жазда аудандық соттың қаулысымен күдікті ҚР ҚК-нің 16-бабының негізінде, яғни әрекет жасау сәтінде есі дұрыс емес күйде болғанына байланысты қылмыстық жауапкершіліктен босатылды. Іс жүргізу тоқтатылды, ал оның өзін тұрақты мекенжайы бойынша жалпы типтегі психиатриялық стационарға мәжбүрлі түрде емделуге жіберді.
Жігітті қорғаушысы емдеу мекемесінен шығарып алуға тырысқан еді. Осы күзде ол қорғауындағы азаматтың іс-әрекетін ҚР ҚК-нің 204-бабы 2-бөлігіне ( бөтеннің мүлкін абайсызда жою немесе бүлдіру) қайта ауыстырып, оған амбулаторлық бақылау және психиатр емін қабылдау түріндегі медициналық сипаттағы мәжбүрлі шараларды қолдану өтінішімен сотқа жүгінген-ді. Алайда қылмыстық істер бойынша Алматы қалалық сот алқасы қорғаушының бұл өтінішін қанағаттандырмады.
Комментариев: 0