Rolls-Royce әдетте мотор қуаты мен машина бағасын ғана емес, өз клиенттерінің есімін де құпия ұстайды. Дегенмен үш-ақ адамға бұйыратын Rolls-Royce Boat Tail-дың шамамен 20 млн фунт стерлинг тұратын алғашқысын кім алғаны белгілі болды. Темір тұлпарды ескі «роллс-ройстар» жинаумен айналысатын Гудвудтар отбасы сатып алған.
Бағасы 55 жаңа RR Phantoms немесе 86 RR Ghost құнына теңесетін машина расымен айрықша болуға тиіс. Boat Tail арқылы британиялық автоөндіруші дербес шанақ жасау дәуірін қайта жаңғыртып, әр көлікке қайталанбас рең бермек. Суретте көрсетілген аспан түстес көлікті құрастыруға мамандар 4 жыл жұмсады.
Ұзындығы алты метр купе-кабриолет Phantom лимузиніне негізделген. Сондықтан капот астына 6.75 литрлік қосарлы турбоүрлемді V12 орнатылады. Шанағы алюминиймен қапталған, ал әр бетті шеберлер қолмен пішіндепті.
Rolls-Royce Boat Tail-дың тағы бір ерекшелігі жүксалғыш құрылымында. Ол күрделі етіп жасалғанмен, қолдануға ыңғайсыз. Ағашпен әрленген есіктің артында тоңазытқыш қоятын қуыс бар. Одан бөлек табиғат аясына серуендегенде қажет болатын ыдыс-аяқ, орындықтар мен шағын үстелге орын табылған, әрі әзірлеушілер жылжымалы шатыр мен жабдықтарды да ұмытпапты.
Клиенттердің тапсырысы бойынша білекке тағып жүруге немесе салондағы арнайы қуысқа орнатуға болатын екі Bovet хронографы жасалды. Оны компания бөлек таныстырады.
Комментариев: 0