Rolls-Royce Париж автосалонына қатыспағанымен, сол уақытта алғашқы электромобилін жұрт назарына ұсынды. Жаңа өнім Wraith және Phantom Coupe моделінің ізбасары саналады, атауы — Spectre.
Өлшемі бойынша Spectre екі ескі модельдің ортасында орналасқан. Ұзындығы — 5453 мм, ені — 2080 мм, биіктігі — 1559 мм, дөңгелек базасы — 3210 мм. Машинаға жіңішке жарықдиодты жүріс шамы мен бамперге жасырылған шамы бар екі деңгейлі оптика орнатылған, дәстүрлі радиатор торын да сақтап қалыпты. Компания Spectre-дің артқа ашылатын есігінің ұзындығы 1.5 метр екенін хабарлады, бұл рекордтық көрсеткіш саналады.
Салонда тосын сый жоқ. Машина интерьері бензинді Rolls-Royce стилінде әрленген. Spectre сатып алушы бонус ретінде төбеге ғана емес, есікке де жұлдызды декорға тапсырыс бере алады.
Spectre жалпы 585 ат күші мен 900 Нм момент беретін төрт электромотормен жүреді. Салмағы 700 келі болатын батареяның сыйымдылығы 120 кВт/сағ, мұндай аккумулятордың арқасында үш тонналық машинаның жүріс қоры 520 шақырымға жетеді.
Spectre-дің пневматикалық аспасы тұрақтандырғышты ажырата алады. Мұндай жабдық жол талғамайтын көлікке арналған, бірақ Rolls-Royce мамандары бұл аспаның тәуелсіз жұмыс істеуін қамтамасыз етіп, түзу жүргенде тербелісті бір дөңгелектен екіншісіне өткізбейді деп санайды. Ал бұрылыста электроника навигатор дерегіне сүйене отырып, тұрақтандырғышты алдын ала жабады.
Spectre 2023 жылдың төртінші тоқсанында сатылымға шығады. Ресми бағасы қазірше белгісіз, бірақ 275 мың фунт стерлингтен басталады деген болжам бар.
Комментариев: 0