Ретро «жук» енді шықпайды

Volkswagen Passenger Cars бас директоры Томас Шефер (Thomas Schäfer) Autocar-ға берген сұхбатында компания неге Beetle немесе Scirocco сияқты көне модельдерді қайта шығармайтынын айтты.

«Бренд үнемі алға ұмтылып, жаңа өнім жасауы керек. Мысалы, Beetle-мен қоштасып, оның орнын Golf басқаны сияқты. Жаңа модель шығарумен қатар, қазір барын жақсартып отыру қажет», — деді Daimler-Benz және Volkswagen-де 30 жыл бойы жұмыс істеген Шефер.

Тәжірибелі маман ретро стиліндегі модельдер ғасыр басында танымал болғанын атап өтті, бірақ қазір олардың заманы өткен. «Көнені аңсаудың керегі жоқ», — деді Шефер.

Бұрыннан таныс модель атауы топтамаға қайта оралатын кездер болады, бірақ ол атауға ие болған машина мүлде басқа. Дегенмен дәл қазір мұны талқылаудың қажеті жоқ деп санайды Volkswagen.