«Коммерсант» басылымы Ресейдің 2035 жылға дейінгі көлік стратегиясын жариялады. Жаңа жоба көлік иелерінің көбіне қуаныш сыйламауы мүмкін, өйткені бағдарламаның басты бағыты — электромобиль мен қоғамдық көлікті дамыту. Ал адамдардың жеке машинасынан өз еркімен бас тартуы екіталай, сол үшін оларды «ынталандыру» керек болады.
Ол үшін «экологиялық класы төмен» көлік құралын пайдалануға кезең-кезеңімен шектеу қою жоспарлануда. Атап айтқанда, экологиялық аймақтар құрып, оған қоршаған ортаға зиянды қозғалтқышы бар машинаның кіруіне тыйым салу көзделіп отыр. Басқаша айтқанда, ІЖҚ бар көліктер алдымен ірі қалалардың орталық бөлігіне, кейін жалпы қала аумағына кіргізілмейді. Сондай-ақ электромобильді қуаттауға арналған бекеттер санын мың есеге көбейту жоспарланған.
Билік адамдарды қоғамдық көлікке ауыстырып, жеке машиналарды шектеуге бел буып отыр. Стратегияда бұл нұсқа бірден-бір таңдау екені айтылған. Жеке көлігінен түскісі келмеген жүргізушіге өзге азаматтармен «көлік құралын ортақ пайдалану» ұсынылады. Мұнда АҚШ пен Еуропада кең тараған карпулинг жүйесі туралы айтылып отыр, ол бойынша бір емес, бірнеше жолаушы отырған көлік арнайы бөлінген жол бойымен жүре алады.
60 триллион рубль жұмсалатын даму стратегиясы алдағы 15 жылда жүзеге асады. Ол өткен аптада президент Владимир Путин басқаратын Мемлекеттік кеңес президиумының жиналысында талқыланды.
Қазақстан да осы бағытта жұмыс істейді. Қоғамдық көлікке арналған арнайы желі, веложолдар мен ақылы тұрақтар ірі қаладағы көлік иелерінің өмірін қиындатады.
Комментариев: 0