Ресейлік Xcite бренді екінші моделін көрсетті

«Автозавод Санкт-Петербург» Xcite брендінің екінші моделін шығара бастағанын хабарлады. Ол — «жетіншіден» әлдеқайда ірі, салоны үш қатарлы және толық жетекті X-Cross 8 кроссовері. Машина Chery Tiggo 8-ге негізделген сияқты, бірақ Chery-дің Ресей нарығына арналған өнімдеріне онша ұқсамайды..

Жаңа модельді мамандар Tiggo 8-дің Қытайда сатылатын бірнеше модификациясындағы дүниелерді қолдана отырып, Xcite бренді үшін арнайы жобалаған деген болжам бар. Бұл шанақ дизайнына да, интерьеріне де қатысты.

Машинаның өлшемдері — 4740×1860×1705 мм, жол саңылауы — 190 мм, жүксалғышының көлемі 193 литрден 2101 литрге дейін ұлғаяды. Кроссовер 7 сатылы роботпен және толық жетек жүйесімен жұптасқан 1.5 литрлік (150 а.к.) бір ғана мотормен жүреді. Алдын ала мәлімет бойынша базалық көлік алдыңғы жетекті болады екен.

Жабдықтар тізімінде алты қауіпсіздік жастығы, 12.3 дюймдік екі экраны бар медиажүйе, 8 дюймдік климат басқару панелі, алдыңғы орындықтарды электрлі реттегіш, кілтсіз ашу жүйесі және круиз-бақылау бар. Орындықтардың екі қатары, рөл, алдыңғы әйнек пен әйнек жуғыштың бүріккіші жылынады. Зауыт өкілдері көлік шанағы қосымша мырышталатынын атап өтті.

Әзірше бағасы да, саудаға шығатын күні де аталмады, бірақ X-Cross 8 алдыңғы модельден қымбат тұратыны белгілі. Қазір «жетінші» модельді 2 499 000-2 636 000 рубльге (12.5-13.2 млн теңге) алуға болады.