Қазір Ресейдің 85 аймағының 17-сінде (Адыгея, Бурятия, Ингушетия, Татарстан мен Удмуртия, Забайкалье, Краснодар, Красноярск және Пермь өлкесі, Амур, Воронеж, Новосібір, Омбы, Ростов, Свердловск, Тюмень облыстары мен Мәскеу) жол ережесін бұзушылар дрон арқылы анықталады. РФ ІІМ хабарлағандай, бұған дейін мамандар жол ережесін бұзғандарды анықтайтын автоматты кешен орнатылмаған ең қауіпті тас жолдар тізімін жасаған. Мұндай жолдарды полиция дрон арқылы бақылайды. Сондай-ақ кейбір аймақта ұшатын аппарат бейнеленген ақпараттық тақта ілініп, «Назар аударыңыз! Қарсы жолаққа шығуға болмайды» — деп жазылған.
Тass.ru ақпаратына сенсек, дрон бірінші кезекте қауіпті жолда қосарлы бүтін сызықты елемей, қарсы жолаққа шығып, өзге көлікті басып озған жүргізушілерді бақылайды. Дрон жол ережесін бұзып, назарға іліккен машинаны полиция тоқтатқанша, оған еріп жүреді.
РФ ІІМ биыл жыл басынан бері дронның көмегімен 45 желікпе жүргізуші анықталғанын хабарлады. Әрі ұшатын аппарат қадағалайтын жолдарда ешқандай апат тіркелген жоқ.
Бұған дейін Шығыс Қазақстан облысының тәртіп сақшылары жол ережесінің сақталуын әуеден бақылауға тырысқан. Ал оның алдында Алматы облысының полицейлері де дронды пайдаланып көрді. Бірақ бұл тәсіл жалғасын тапқан жоқ.
Комментариев: 0