Ресейдегі Mercedes-Benz активі «Автодом» дилерлік желісінің меншігіне өтті. «Автодом» 2019 жылы салынған Есиповодағы зауытты да қолға алды, бірақ онда нақты не шығатыны қазірше белгісіз.
Ресейдегі Mercedes-Benz иесінің ауысқаны туралы «Интерфакс» заңды тұлғалар реестрінің дерегіне сілтеме жасап хабарлады. «Автодом» Mercedes-Benz-тің 100 % үлесіне иелік етеді, зауыт та, қаржылай және лизинг жағынан қолдау көрсететін компаниялар да дилердің меншігіне өтті.
«Автодом» келісімшарт жасалғанын растаған жоқ. Олар «РИА Новости» агенттігіне мемлекеттік органдармен келіссөз жүріп жатқанын, нақты нәтижесі ай аяғына қарай белгілі болатынын айтты. Келісімшартта Mercedes-Benz белгілі бір уақыт ішінде активтерін қайтарып алуға құқылы екені жазылады. Демек халықаралық санкция күшін жойған соң компания Ресей нарығына қайта оралуы мүмкін. Мұндай схема бірінші рет кездесіп отырған жоқ. Renault, Nissan және Porsche компаниялары да Ресейге қайта келуге мүмкіндік беретін келісімшарт жасаған.
Mercedes-Benz зауыты 2019 жылы ашылды, салтанатты шараға президент Путин қатысқан. Ол Ресейдегі ең жаңа шетелдік автозауыттардың бірі. Кәсіпорында E-класс седандары мен бірнеше кроссовер шығатын. Онда жылына 30 мың машина өндіруге болады.
Бұған дейін «Автодом» өкілдері Mercedes-Benz зауытында қытайлық премиум көлік шығаруды жоспарлап отырғанын айтқан. Нақты қай компания екені белгісіз, бірақ қолда бар ақпаратқа сүйенсек, FAW құрамына кіретін Hongqi жаңа серіктес атануы мүмкін. Сондай-ақ зауыт FAW концернінің бюджеттік модельдерін де жасайтын шығар.
Зауыт жаңа серіктеспен нақты келісімшарт жасалған соң тоғыз айдан кейін іске қосылады деген ақпарат бар. Жақында Калугадағы Volkswagen зауытының да иесі ауысады. Оны «Авилон» дилерлік компаниясы алып, Chery көліктерін құрастыруы мүмкін.
Комментариев: 0