Армениялық машиналарды ұстау шарасы алдымен одақтас елмен шекаралас жатқан оңтүстік аймақтарда басталды. Армениялық көліктің көп бөлігі осы өңірде екен.
Ресей азаматтары да, қазақстандықтар сияқты бірнеше жылдан бері Армениядан көптеп көлік әкелген. Оларды санаған ешкім жоқ, бірақ елде шамамен 40 мың армениялық машина жүйткіп жүр деген болжам бар. Дәл біздегідей, мұндағы тәртіп сақшылары да бастапқыда мәселеге мән бермеді, бірақ аяқ астынан жағдайды реттемекке бел буып отыр.
Бұл әрекетін полицейлер ереже бұзғандарды бейнекамера арқылы анықтау, деректер базасынан тауып, айыппұл салу мүмкін болмауымен түсіндірді. Қазақстанда армениялық көліктерге қатысты заңға өзгертулер енгізіліп, оларға сары нөмір алу не елден шығару үшін 2020 жылдың 1 қыркүйегіне дейін уақыт берілді. Ал көрші ел ештеңеге бас ауыртпай-ақ, жаппай айыппұл салып жатыр.
Ғаламторда «РФ аумағында тіркелмеген көлік құралдарына қолданылатын әкімшілік шаралардың алгоритмі» деген құжат жарияланды.
Оның шынайылығы белгісіз, бірақ мәтінінен шетелде тіркелген көлік иелеріне РФ ӘҚБК-нің 12.1-бабы (бекітілген тәртіпке сай тіркелмеген көлік құралын жүргізу) бойынша 500-ден 800 рубльге дейін (2 892-ден 4 627 теңгеге дейін), ал екінші мәрте қайталанса, 5 000 рубль (28 915 теңге) айыппұл салынатынын не бір айдан үш айға дейін жүргізуші куәлігінен айыратынын білуге болады.
Ал егер ресейлік Армения азаматының атына тіркелген машинамен өз елінде жүйткіп жүрген болса, онда РФ ӘҚБК-нің 12.3-бабы (Кедендік одақ заңнамасында қарастырылған көліктің уақытша кіргізілгенін растайтын құжаты жоқ жүргізушінің көлік басқаруы) бойынша жауапқа тартылады.
Полицейлер аталған ережені бұзғаны үшін қанша ресейліктің жауапқа тартылғанын айтпады, бірақ БАҚ ақпаратына сүйенсек, армениялық көлік тізгіндегендер жаппай ұсталып жатқан көрінеді.
Ал Қазақстан билігі 1 қыркүйектен кейін армениялық машиналарға қатысты қандай шешім қабылдар екен?
Комментариев: 0