Қытайлар Stellantis-ке электромобиль жасауға көмектеседі

PSA Group пен Fiat Chrysler Automobiles бірігуі нәтижесінде құрылған Stellantis альянсы 2025 жылды 26.3 млрд доллар шығынмен аяқтады. Бір жыл бұрын марка 6 млрд доллар пайда тапқан. Төмен көрсеткіштің басты себептерінің бірі — электрлендіру жоспарын қайта қарау. Бұған АҚШ-тың қазіргі саясаты да әсер етті.

Қазір альянстағы компаниялар электромобиль әзірлеу бағдарламасын тоқтатты. Бірақ Stellantis батареялы көліктен бас тартпайды. Басшылар Қытайдан, нақтырақ айтқанда, Leapmotor-дан көмек сұрайды.

Automotive News хабарлағандай, Stellantis-тің атқарушы директоры Антонио Филоза серіктестерден алатын технологиялар миллиардтаған доллар үнемдеп, электромобиль жасау саласындағы озық әзірлемелерге қол жеткізуге мүмкіндік береді деді. Мұндай ынтымақтастық қытайларға да тиімді, өйткені олар өнімдерін Еуропада жасау арқылы жоғары баж салығынан құтылады әрі АҚШ нарығына шыға алады.

Stellantis бұған дейін Қытай көліктерін Еуропадағы кәсіпорнында жасаған. 2024 жылы Польшадағы Fiat зауытында Leapmotor T03 моделі шықты, бірақ бұл жоба жалғасын таппады.