Қытайлар француздарға арзан электромобиль жасауға көмектеседі

Қытай компанияларының таңдай қақтырарлық жетістігі қарт құрлықтағы концерндерді бәсекелесімен серіктес болуға итермелеп жатқан сыңайлы. Қазір электрокар сегменті аса өзекті, өйткені электр қуатымен жүретін арзан машиналарды көптеп сату EV саласының қарыштап дамуына үлкен үлес қосады.

Біраз уақыт бұрын Renault-ның бас директоры Лука де Мео Еуропадағы өндірушілерді өз отанында Қытай өнімдеріне қарсылас бола алатын арзан электромобиль құрастыру үшін Airbus сияқты конгломерат құруға шақырған. Бірақ Volkswagen келісімнен бас тартты, ал Renault шығыстағы әріптестерімен бірігуді жөн көріп отыр.

Automotive News Europe таратқан ақпаратқа сүйенсек, екі елдегі мамандардың бірлескен жұмысының алғашқы нәтижесі Twingo моделі болады. Марка оның концептісін былтыр көрсеткен. Ішкі құрылымын Қытай бренді жобаласа, Ampere бөлімі машинаның дизайны мен интерьері үшін жауап береді.

Тегі бөлек болса да, жаңа көлік Словениядағы Renault зауытынан шығады. Электрлі Twingo-ның бағасы 20 мың еуродан төмен болады деген болжам бар.