Xpeng Қытайда Mona суббрендінің алғашқы моделі M03-тің бағасын жариялады. Бес есікті машина 119 800–155 800 юань (8–10.5 млн теңге) тұрады. Жаңа өнім Xpeng маркасының ең арзан электромобилі атанып отыр.
Лифтбэктің өлшемі — 4780×1896×1445 мм, дөңгелек базасы — 2815 мм (Model 3-тен сәл үлкен), жүк салғыш көлемі — 621–1602 литр. Mona M03 бір моторлы, алдыңғы жетекті болады. Базалық нұсқасы 190 ат күшін беретін мотормен, ал өзге екі түрленімі 218 ат күшіне ие агрегатпен жүреді. Олар алғашқы жүздікті 7.8 және 7.4 секундта еңсереді.
Электрокардың жүріс қоры аккумулятор (BYD-дің 51.8 немесе 62.2 кВт⋅сағ батареясы) сыйымдылығына байланысты 515–620 шақырым болады.
Mona M03-тің интерьері Tesla стилінде жасалған, ешбір батырма жоқ, 15.6 дюймдік үлкен ортаңғы экран ғана тұр. Аспаптар панелі болмайды, бірақ 599 юань төлеп, шағын экран қойғызуға болады. Жаңа өнімнің жабдықтар тізімінде Snapdragon 8155 чипіне негізделген медиажүйе, жылытуға және желдетуге болатын алдыңғы кресло, 1.22 кв. м панорамалы шатыр және электронды көмекшілер бар.
Автомобильдің алғашқы екі комплектациясы қыркүйекте саудаға шығады, ал үздік нұсқасын 2025 жылға дейін күтуге тура келеді. Ол әлі дайын емес деген ақпарат тарады, өйткені бұл Mona M03 қосымша жартылай автономды басқару жүйесімен жабдықталады. Xpeng жаңа өнімге тапсырыс қабылдау басталған соң бір сағатта 10 мыңнан аса тапсырыс түскенін хабарлады.
Комментариев: 0