Қытайда Zeekr 7X арзандады

Компания 7X-тің тікелей саудасын бастады. Жаңа өнімге тапсырыс қабылдау қыркүйектің басында басталған, сол кезден бері компания 60 мыңға жуық тапсырыс жинады. Клиенттерге жеткізетін кезде 7X-тің бастапқы бағасы 229 900 юаньға (15.6 млн теңге) түсті, яғни электрокар бірден 10 мың юань арзандады. Басқа комплектацияның да бағасы күткеннен төмен болып шықты.

Қытай нарығына арналған Zeekr 7X-тің үш модификациясы болады, олар опция және күштік құрылымымен ерекшеленеді. Базалық модельге 422 ат күшіне ие бір электромотор мен 75 киловатттық аккумулятор орнатылады, жүріс қоры 605 шақырымға жетеді. 249 900 юань (шамамен 17 млн теңге) тұратын орташа нұсқаның аккумуляторы 100 киловаттқа дейін артып, жүріс қоры 780 км құрайды. Ең қымбат 7X-тің бағасы 269 900 юань (18.3 млн теңге), оның алдыңғы осіне 224 ат күшіне ие мотор қосылады, алғашқы жүздікті 3.8 секундта еңсереді, бірақ жүріс қоры 705 шақырымға дейін азаяды.

Электрокардың базалық комплектациясына үш аймақты климат-бақылау, массаж функциясы бар орындықтар, 13.5 және 16 дюймдік екі дисплейі бар медиажүйе кіреді. Қымбат көлікте жүргізуші көмекшілері, клиренсін 230 мм-ге дейін көтеруге мүмкіндік беретін пневматикалық аспа және артқы жолаушыларға арналған 13 дюймдік экрандар болады.

Кроссовер туралы ақпарат бұған дейін толық белгілі болды. Zeekr тікелей саудаға шығару салтанатында қауіпсіздік саласындағы ерекше жаңалығын хабарлады. Мысалы, 7X балалар үшін арнайы әзірленген орындықпен жабдықталды, оның жетілген құрылымынан бөлек, қауіпсіздік жастығы бар. Электрокар су тасқынына тап болса немесе суқоймаға құласа, салонында бүйірлік әйнектерді сындыратын жасырын батырма қажетке жарайды.

Марка 7X-тен жаһандық модель жасауды жоспарлап отыр. Жаңа модель ресми сатылатын елдерде сатылады, Қазақстанға бір жыл ішінде келеді.